على قد فلوسنا…وفلوسكم

empty

كتبت إحدى القارئات سمت نفسها- واحدة من جمهوركامل- تعليقا على آخر تدوينة لي، تقول فيه أنه لا يحق لي انتقاد صحافتنا ولا صحفيينا لجملة من الأسباب من ضمنها لأن أحوالهم تصعب على الكافر كما يقول أخوتنا المصريين و أنهم لا يتلقون تدريبا و لايتقاضون رواتب مجزية تعين على حياة كريمة ناهيك عن أن تكون دافعا مغريا لأن يتحملوا مهنة يقال أنها مهنة متاعب. أعترف بأن وجهة نظر القارئة المعلقة وجيهة– و لو أن حاستي النميمية تقول لي أنها صحفية – لكن فعلا ما الذي يدفع صحافي يتلقى أجرا بالكاد يسد الرمق لأن يسعى و يجتهد؟ نفس الشيء يقال عن الموظف الحكومي الذي تسمر في مرتبة وظيفية متدنية لمدة 12 سنة، و موظف خدمة العملاء في البنك و موظفة الاستقبال في المستوصف و المستشفى الخاص، و غيرهم و غيرهم؟

اليوم قرأت مقالة اسمها على قد فلوسنا يقول كاتبها أن لاعبي الكرة في أنديتنا السعودية ينطبق عليهم نفس الوضع فلا يجب أن يتوقع أهل الرياضة الاستمتاع بكرة قدم على مستوى لأن اللاعبين هم ” لعيبة أي كلام” على قد فلوس الأندية.

بعد تفكير عميق، وربط بين المقال و التعليق، وبعد التفكر في حال مستوى الأجور لدينا استنتجت التالي: يجب أن لا نتوقع أي خدمة سواء كانت أساسية أو كمالية أن تأتي على مستوى تطلعاتنا لأن معظم العاملين في البلد يتقاضون أجورا أدنى من الحد المطلوب. لا تتوقع أن تحصل على عمل متقن من أي عمالة تتقاضى فتات، و إن أدخلت أولادك مدارس خاصة لا تتوقع أن يفلقوا الذرة و لا أن يرطنوا بلغة الفرنجة لأن مدرسيهم و مدرساتهم يتقاضوت أجورا مخجلة. و إن احتجت طبيبا في مستشفى غير المستشفيات التي توظف الأطباء من ذوي العيون الزرق وتخدم بعض المحظوظين من الشعب فلا تتوقع أن يكون طبيبا من أصله، وإن اتصلت بخدمة العملاء لا تتوقع أن يعبأ بك أو بمشكلتك موظف يتقاضى 1500 ريال شهريا، و إن لا سمح الله اتصلت على الإطفاء لا تتوقع أنك متصل على الفاير أند رسكيو اللي تشوفهم في المسلسلات لأنه الغلبان اللي يشتغل هناك مرمي في حوش في احيان كثيرة بلا حتى تكييف و حالته هو الآخر تصعب على الكافر تماما مثل الصحفي! باختصار أنت تعيش في مكان الأجور فيه لا تستقطب سوى النطيحة و ما أكل السبع من الكفاءات.

الشاهد، لا أسمع أحد فيكم يشتكي بعد الآن من سوء أي خدمة أو عدم لباقة أي موظف أو عنجهية أي رجل مرور…. لأنه وكما اتضح…لا أنتم قاعدين تدفعوا ضرايب مثل الشعوب المتقدمة حتى تلاقوا خدمات تتناسب و ما دفعتم، و لا انتم نايمين على آبار بترول و فلوسكم زايدة عشان تشت…………… بترول ؟؟!!!!!&*%$# – بقية التدوينة حذفها الرقيب ابحثوا عنها في المنبر تحت تبويب منع من النشر –

و بالمناسبة، للإخوة و الأخوات القراء اللذين اشتكوا من قلة تدويناتي…أقول:على قد فلوسكم تقرؤون, وهذه التدوينة حتى بدون صورة أو كاريكاتير، اللي مستعد يدفع…يروح يشتري جريدة.

والله و لي التوفيق،،،

هذا المنشور نشر في Humor, Saudi Arabia, Saudi Journalism, باب المضحكات وكلماته الدلالية . حفظ الرابط الثابت.

15 ردا على على قد فلوسنا…وفلوسكم

  1. يقول asma Qadah:

    “السعودية بلد غنية بالثروات والبترول”
    هدي العبارة أسمعها في كل مكان! حتى من العواطلية اللي متسدحين قدام التلفزيون ٢٤ ساعة ويتبكبكوا عشان ماعندهم وظايف! ولو اتوظفوا يتذمروا من الشغل والكرف اللي هو فوق مستوى الراتب لأن راتب ٢٥٠٠ مو مكفيهم ياحبة عيني!!!

    صحيح
    لا تطالبوا الحكومة والبلدية بشوارع تظيفة وواسعة ومرتبة اذا ماعندكم استعداد تدفعوا ضرائب الشوارع!
    لا تطالبوا مدارس تعلّم وتفهّم اذا لسة بتدرسوا في مدارس مجانية ونهاية كل ترم بترموا الكتب في الشوارع وتزيدوا من نسبة التلوث البيئية و الفكرية!

  2. وجهة نظر صحيحه ولكن غلط ..

    وشلون؟

    انا بقولك وشلون 🙂

    صحيح ان الموظفين في جميع القطاعات الحكوميه لا يستلمون الا فتات الفلوس ورواتب بالكاد تسد حوائجهم … وعلشان كذا تتراكم عليهم الديون وبالتالي تشين اخلاقهم …

    اما بالنسبه للاعبين فهذا الشئ مفروض مايطبق عليهم … لانهم الآن يستلمون رواتب جداً عاليه … ولكن اللي ما براسه لعب اكيد ما براسه لعب … والرياضه لازم تكون التزام وثقافه … يعني في الدوري الأوروبي اللاعب يعيش علشان الكوره وينظم حياته واكله وروحته وجيته على هالكوره … لكن لاعبينا للحين تفكيرهم ” وسع صدرك ” يعني فيه لاعبين في معسكر تدريبي يرووحون يسهرون في ديسكو؟ هذول وهم لاعبين منتخب وكانو موعودين بمبالغ طائله في حال فازو ..

    وبالنسبه للضرائب … فصدقيني الدوله اللي تتربع على النفط وهي من اكبر الدول المصدره له وشعبها عايش تحت خط الفقر ولا عليه … تأكدي لو خذو ضرايب ما راح يتغير شئ …

    الموضوع ماهو نقص فلوس … يعني مثلاً مشاريع الشوارع اللي في الشرقيه مرصوده لها ارقام فلكيه ومع هذا اللي انجزت مستواها اقل من العادي …

    مشروعاات التطوير الحكومي صرف عليها ميزانيات خياليه .. وبالاخير طلعو بموقع مكتوب فيه اطبع الفورم وتعال راجعنا …

    المشكله عندنا في العلاقه بين الحكومه والشعب … الحكومه تشوف الشعب وتقوله ترا رواتبكم زينه … شوفو دول افريقيا ماهم قادرين يعيشون ..

    الفرق في النظره … والمفروض ان يتم النظر على ان المواطن شريك في النجاح … فنجاح المواطن ( بعد اكرامه ودعمه مادياً ) سوف يعود على البلد بكل تأكيد ..

    بس يمكن هم مرتاحين كذا ؟ 🙂

    ولكن لو تكلمنا على قد فلوسك تعيش .. فهذا ينطبق على المحطات الفضائيه اللي باشتراك , او بعض الخدمات اللي على الانترنت وبفلوس , ولا على السيارات , او السكن في الفنادق, او جودة الملابس ..

    فهذا شئ ينطبق عليه .. قد ما تدفع قد ما تلاقي

  3. وما قلتي لنا بكم اشتراك المدونه؟

    مثل مدونتك تستحق الاشتراك

  4. يقول Entropy:

    أسماوابراهيم

    أول شي زمان عنكم والله لكم وحشة 🙂

    أسما:
    لو تركنا الموظفين الحكوميين على جنب وبدون تريقة نظام الأجور عندنا أو بالأحرى “عدم نظام الأجور” يشكل مشكلة كبيرة. يعني لما يتوظف واحد أو وحدة براتب 2500 زي ما قالت أسما هذا ان كان محظوظ .. فهذه ال2500 هي كل ما يحصل عليه ليعيش، فلا خدمات صحية زي في أوروبا ولا خدمات اجتماعية من الحكومة زي سكن مخفض للغير قادرين أو بيووت إيواء للغير قادرين على إيجاد سكن ولا حتى مواصلات عامة في البلد ولاااااا شي!
    يعني تقريبا هو عايش على خط الفقر أو تحت “خط البلدة” 🙂

    أما بالنسبة للضرايب فهل أفهم منك يا أخت العرب انك تؤيدي أن يدفع السعوديين المسدحين أمام التلفزيون ضرائب؟ 🙂
    الضرائب حجر أساسي في الدول الديمقراطية و يوجد ما يماثلها في النظام الإسلامي ..أن يكون هناك بيت مال للمسلمين يصرف منه على أمور مثل اللي ذكرتها لكن الشرط هو أن يكون الشعب مشارك في الحكم.
    الضرائب فكرتها من أيام الرومان كان يدفعها الفقراء أيضا لكن في الدول الحديثة أصبحت مشروطة بمشاركة الشعب في الحكم لأن بدون هذا الشرط تصبح الضرائب كما كانت في أيام الأولين “إقطــــاع”.

    لا نختلف عن أن الشعب السعودي -و حتى الخليجي – يتوقع كل شي من الحكومة بدون مقابل لكن لا تنسي إن الحكومات الخليجية قائمة على ما يشبه نظام الشرهات … خلي الشعب يعيش بس خليه ساكت و لا يتدخل في أمور تخص الشيوخ. هذا الموضوع يحتاج تدوية أخرى.

    ابراهيم

    هذي هي بالظبط زي ما قلت “المشكله عندنا في العلاقه بين الحكومه والشعب”
    أتاريك شيخ و احنا مو داريين.
    بالنسبة للاشتراك … الشيوخ اللي زيك ما يحتاج اشتراك تجيهم اشتراكات مجانا و كهرب مجانا و تتسفلت الشوارع اللي قدام قصورهم في لمح البصر وكله مجانا 🙂

  5. يقول Abderrahman:

    المفروض نظرية على قد فلوسكم يكون قصادها نظرية فيه أحسن منك ممكن يؤدي عملك و منتظر الفرصة
    المشكلة في بلادنا هي غياب التنافسية، والمقارنة دايما بمن هو ادنى
    اعتقد نظرية على قد فلوسكم هي اللي اوجد الفساد الموجود في بعض الادارات والمحليات.. طبعا انا بتكلم عن مصر
    🙂

  6. يقول Entropy:

    عبدالرحمن

    تنافسية أيه اللي انت جي بتؤول عليها يا عبده باشا 🙂

    التنافسية دي فورن كونسبت عندنا…بس والحق يقال عملوا لها مؤتمر كبير في السعودية في بداية السنة 🙂

  7. يقول نوران:

    هذا ما يحدث عندما تصبح الحياة مادية وبلا أي معايير!
    قد تكون نظرتي وردية جداً، ولكن إن اشتغل موظف الآن بحق وضمير بنية صادقة للتغيير نحو الأفضل – حتى لو على فترات طويلة .. سيتغير حال البلاد .
    لأن هذا الموظف البسيط بمفاهيمه نحو الأفضل سوف يصبح مسؤولاً حكومياً يوماَ ما ويُفيدنا جميعاً.

  8. يقول asma Qadah:

    يختي الوحشة انتِ لا تطلي في المدونات ولا تكتبي 😛

    شفتي كيف نحن مقربعين يا بنتي؟ نظام ماشي بالبركة، على الشرهات!! وهدا اللي يخلي الشعب ياكل تبن ويسكت حتى لو داسوا له على طرف! شعب همه يجمّع الفلوس من أقصر الطرق وأسهلها حتى لو كانت بالشحاتة المبطنة!!
    نظام الضرايب أو زي نظام الاقطاع اللي كان في الدولة الاسلامية شي جميل، سيبك ان البلد فيها فلوس وكلها مكومة في كرشة الناس اللي انت عارفتهم، نحن (أو بالأصح الشعب) هو اللي فتح المجال للناس هدولي ان كرشتهم تكبر! قيد شفتي عندنا نظام أو قانون محاسبة المسؤولين؟ والله المرتشي يرتشي ويفرك ولا أحد يكلمه!!
    ماليزيا على سوءها واللي فيها عاجبني فيها ان محد له يد أو صلاحية في خيرات الدولة، ولو حصل على طول يتفّنش و المرتشي ينفضح قدام الملأ وفي الأخبار والتلفزيون والجرايد! لكن عندنا كلو يغلط وسكتم بكتم!
    مشكلتنا المسؤولين ماعندهم فصل لموارد الدولة ومواردهم هم وجيب الحكومة هو جيب الناس هدوليك :ٍ

    ويـــــــــــــــه بس اش اقول واش اخلي 😛

  9. من هذا المنطلق، لازم يكون الزعماء العرب و الوزراء على قد التريليونات و الملايين اللي يختسلونها من مقدرات الشعوب. مع الأسف مستوى عطاءاتهم لا تتناسب مع أشخاص يتقاضون ريالات قليلة.

    القضاة مثلا يتقاضون مرتبات عالية جدا و مع ذلك لا يؤدون أداء شخص بحمسين ريال و لو وجدتهم في محل أبو ريالان ما إشتريت أحدهم.

    الحقيقة طلعتينا عذر حنا يالمدونين الكسالى و لكن مع نقض هذه النظرية أعتقد لازم تدونين أكثر و تصرفين شوي على المدونة لأن اللي شغال في هذا البلد هم الفقارى.

  10. يقول Entropy:

    نوران

    لن أقول ان نظرتك وردية…لكن لاحظي أننا مجتمع انساني و ليس ملائكي.
    المادة جزء من حياة الناس و إلا انقلبنا ملائكة تسبح و تعبد ربها ليل نهار بلا تعب أو انتظار لمكافأة.

  11. يقول Entropy:

    أسما

    مرة تقولي متسدحين قدام التلفزيون
    و مرة بيرموا الكتب في الشوارع
    و مرة بيشحتوا شحتة مبطنة!!
    ايش مشكلتك مع السعوديين ؟؟؟
    الله يهديكي و يهديهم بس قولي آمين

    🙂 🙂 🙂

  12. يقول Entropy:

    عبدالله العتيبي

    على قول أحد المدونين الحكماء:
    “أنت قارئ مذهل” 😉 لكن للأسف القوانين عندنا ذات اتجاهين … اتجاه اجباري للفقارى اللي زينا مثل ما قلت والاتجاه الثاني للواصلين.

    فعلا جبتها … لو لقينا من هالقضاة أو المدراء في محل أبو ريالين قلنا خسارة فيهم ما بستاهلوا!

  13. تنبيه: التسويق فاشل ..!! | مضيعة بيتهم

  14. تنبيه: التسويق فاشل ..!! « مدونة اللتان

  15. يقول شات كتابي:

    مرة تقولي متسدحين قدام التلفزيون
    و مرة بيرموا الكتب في الشوارع
    و مرة بيشحتوا شحتة مبطنة!!
    ايش مشكلتك مع السعوديين ؟؟؟
    الله يهديكي و يهديهم بس قولي آمين

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s